قلب موحد

أجمل قلب ممكن تتعامل معاه   القلب الموحد  لأن  الله  مش مجرد لفظ على لسان صاحبه وأحد المفردات على لسانه لكن الله  فى قلبه  هو المعبودالحق الذى لا معبود بحق سواه  ده بيخليه إنسان جميل فى معاملاته لأنه ح يخاف ربنا سبحانه وتعالى فى الشاردة والواردة مش ح يكدب عليك ولا ح يخونك ولا حيلف ويدور عشان مصلحة دنيوية القلب الموحد ده بيكون بين اللى حواليه زى مصباح من النور أو روح جميلة بتشع طاقة إيجابية  حتلاقيه معاك فى الخير وأبعد ما يكون عن الأذى والشر القلب الموحد ده كنز كبير لكن مش كل العباد بتقدر الكنوز اللى حواليها  ومش كل الكنوز اللى ربنا حبانا بيها بنعرف قيمتها للأسف الشديد  القلب الموحد هوه القلب السليم اللى مطلوب منك إنك ترجع بعد رحلتك فى الدنيا لربنا بيه  (( إلا من أتى الله بقلب سليم )) .

التوحيدالخالص لله عزوجل فى القلب ده هو هدف حزب الشيطان وجنوده بيحاولوا بكل الطرق محاربته وشغله وحصاره لأن القلب ده إذا بلغ بالتوحيد مبلغ الوصل بإنه يكون عبد موصول فبتكون دى هزيمة كبيرة جدا لحزب الشيطان فتخيل بقى لو القلب الموحد الموصول ده بقوا إتنين أو تلاتة أو عشرة أومائة أو ألف أو مليون !!! إذا حصل ده  فلازم تعرف إن الأرض حالها ح يتغير للأحسن  وممكن تشوف  زى ماحصل قبل كدة فى عهد الخليفة عمربن عبدالعزيز  الشاة مع الذئب ولا يقدم على إفتراسها ؟!!! ولما سألوا خامس الخلفاء الراشدين الإمام العادل  عن سر المشهد ده  قال  أصلحت مابينى وبين ربى فأصلح الله لى بين الذئب والغنم  ! كلام كبير ومهم وخطير وهوه ده لب الملاحم  بين حزب الرحمن وحزب الشيطان  بلوغ وصل الله  فسطاطين مالهمش تالت   قلوب موصولة بالرحمن  وقلوب والعياذبالله  مفصولة . 

إوعى تفكر إن المليارات اللى بيصرفها حزب الشيطان على نشر الفواحش وإشاعة الفسق والفجور بكل الوسائل وبكل الطرق أمرعشوائى  لا  ده مخطط كبير لشن حروب طويلة لحصار القلوب والأرواح عشان تكون مفصولة فلا تتلقى نصرة ربها وتكون مخذولة حزب الشيطان عايز يوصل بالقلوب لمرحلة اليأس من رحمة الله والعياذ بالله وبالتالى تكون فريسة سهلة لوحوشه وذئابه وضباعه  لكن القلب الموحد المتعلق بالله يستحيل ييأس من رحمة الله  عارف إن له رب رحيم وغفور فدايما بيتوب ويرجع ويستغفر وهوه على يقين إن رحمة ربه سبحانه وسعت كل شيء  فمهما يقع بيقوم ويقاوم ويعافر ويكمل المشوار ومستحيل يستسلم  فبيستقبل نصرربنا ووصله ورحماته اللى بتكون بردا وسلاما فى وسط آتون النار اللى بيشعلها حواليه  حزب الشيطان .

القلب الموحد  نعمة كبيرة جدا جدا  قلب مقاوم ومكافح  وربنا مستحيل يضيع أجره  لأنه بيحبه  ! أيوة بيحبه ربنا سبحانه وتعالى بيحب القلب الموحد ودايما بينصره وبيطهره وينقيه عشان يوصله  أهم شيء متيأسش قاوم وكافح وإن وقعت قوم وإستغفر وإرجع بسرعة وتوب وكمل الطريق يقينا ح ينصرك ويوصلك وساعتها ح تكون جزء مهم وممكن بالمزيد توصل إنك تكون الجزء الأهم  فى  فسطاط حزب الرحمن اللى شرط وجودك فيه قلبك الموحد فحافظ عليه وأحرسه وطهره ونقيه من الشهوات والشبهات  ده جهاز إرسالك وإستقبالك العظيم  خليك حريص جدا إنه ما يتسرقش منك أو يستحوذ عليه حزب الشيطان لأن لو ده حصل لا قدرالله  ح يأسروا روحك  وتكون سجين مغلغل عندهم ومحتاج حد يفك أسرك وده مش محال لكن  الوقاية خير من العلاج  فخليك  حر بروحك وقلبك وعقلك وجوارحك  خليهم يطوفوا فى طاعة الله ويبعدوا كل البعد عن معصيته   ساعتها صدقنى حتكون أنت جزء من جنود الفتح الأعظم اللى جى لا محالة    فتح إيه ؟!!!   إنت نسيت  أنا قولتلك قبل كدة   فى مقالات كتير  بس  الحروب والضغوط والدنيا نسوك   إن الفتح الأعظم المبين  جى لا محالة فكون جزء منه  وما تكونش من القاعدين  حرر قلبك وروحك وعقلك    صدقنى ح تكون جزء لا يتجزء من جنود  تحرير القدس  حتى وإن كنت مش موجود فى الأرض المقدسة حتاخد نفس الأجر بقلبك الموحد وروحك الموصولة ونيتك الصادقة   ((إن وعد الله حق ))  .أمين بدر.مصر.الخامس من ذى الحجة 1442هجرى 15/7/2021ميلادى.